O le Itumalo o Palauli II o lo’o faatulaga i le itu saute i sisifo o le motu o Savai’i i le va o Palauli I ma Satupaitea. E puipuia e papa tu mai le sami ma aga’i mai ile luga ile fogaeleele ma soso’o ai ma papa ma’a mai le lava ona fa’apena lea ona ufitia lona gataifale e maamaa. O isi vaega ole gataifale oloo iai matafaga pa’epa’e ma o lenei vaaiga e fa’asolosolo atu lava
mai le ilititai ma agai atu ai i ona laufanua i auvae mauga ile itu i matu ole itumalo ile vaega olo’o fa’amalumalu mai ai le mauga o Silisili.

A'AFIAGA OLE TAU
E aafia le Itumalo I tulaga louloua ole tau aemaise I timuga ona ole tele o vai oloo tafe mai auvae mauga ma lamatia ai le laufanua i lologa. E lua vai oloo tafe mai auvae mauga ma e tele le aafiaga ole laufanua pe a tetele timuga ma aafia ai le saogalemu o tagata faapea ai ma latou ala oa. O vaitafe e lua e aofia ai le vaitafe o Sili lea oloo tafe atu i Puleia ma agai ai ile sami male vaitafe o Gataivai lea oloo tafe atu ile itu i sisifo o Gataivai ma fetaiai ai ma le alavai mai Gautavai ma agai ai ile sami. Ole mau ole itumalo i le tulaga tau vai ua faapea ai ona faatino lava a latou polokalama suavai fa’atasi ai ma le fesoasoani a le Sosaiete o Vai Tumaoti.

O le tele o falesa tapuai ma fale aoga o le itumalo olo’o tu aga’i i totonu mai ole gataifale ma o se tulaga saogalemu mai lu’itau o a’afiaga o suiga ole tau. E maaleale le tulaga ole itumalo ona e fa’asaga ile itu ala o matagi ma timuga ile itu saute o Savaii. O nisi vaega ole itumalo olo’o nofoia vaega e masani ona a’afia i lologa ma fa’aleaga ai lona laufanua pe a malosi uaga leaga ole tau.

VAITAFE
E tele vaitafe ma au auvai olo’o tafe solo i totonu laufanua ole itumalo ma lamatia ai fanua ma ala oa pe a malosi uaga ole tau aemaise lava lologa. O le vaitafe i Sili e tafe malosi aemaise pe a tetele timuga ma ona ole tele ole oga eleele e tafe mai ai lea vaitafe e tele lava le avanoa e fa’aleagaina ai le laufanua, ala oa ma meatotino a tagata pe a pa lenei vaitafe. E ao ai ona faia ni auala e puipuia ai le fa’aleagaina o augutu o vaitafe a le itumalo aemaise lava le vaitafe i Sili.

O lo’o pulea e Sili ma Gautavai ma Papa Puleia a latou lava suavai seia vagana Gataivai o lo’o fa’aaogaina le auaunaga o suavai a le Malo. Ae ole mea taua ole faia o polokalame e puipuia ai le saogalemu o tagata mai lologa aemaise le faia o ni auala e apo ai le suavai tafe ma fa’alemu ai le malosi ole tafe a ole vai pe a louloua le tau.

MATA'AGA
O lo’o iai foi ni mataaga ua lauiloa ai le Itumalo i talaaga o Samoa. O nisi o nei mataaga e aofia ai, le papa o le fa’atolotologatama i Gataivai, ole afu o mu panoa i Puleia, ole faga i Anamoea Papa, ole afa fa’alogo a Tupuivao i Papa, ole faugagana i Gautavai ma Sili, male Afu o Sinaloa i Sili.

ATINA’E O FA’ATOAGA
I le faitau aofa’i o fa’atoaga, lafumanu ma faigafaiva sa fa’atunu’uina i le 2019, na fa’amauina ai le aofaiga o aiga olo’o galulue i fa’atoaga e 422. O le aofaiga o lona eleele ua mafai ona fa’ato’aina i fa’atoaga ma lafumanu pe tusa lea ma le 4,324.8 eka. E tusa lea ma le 94.2% o eleele o le itumalo olo’o galulue i fa’atoaga ma lafumanu ma o se vaaiga e fa’ailoa ai e tua le itumalo i ona fanua mo lona tamaoaiga.

Ole tele o vaega ole laufanua o le itumalo oloo nofoia e tagata ma aiga tulata ile gataifale ae le mamao mai le vaega o le laufanua oloo galueina ai faatoaga. Ole tele o atinae faatoaga ma lafumanu oloo faatino lea ile itu matu ole auala tele agai atu i luga o auvae mauga. O le tele o lenei eleele ua iloga le suiga o lona siosiomaga ona ole tele o tausaga sa faaaoga mai ai. O nisi o suiga e aofia ai le faaitiitia o toga vao tetele faapea foi ma isi laau eseese sa filogia ai le tuputupua’e o laau ma manu felelei lea ua iloga le faaitiitia pea faatusa atu ile 20 tausaga ua mavae.

AUALA TETELE
O le ala tele lea o loo faalava atu i totonu ole Itumalo o le ala tele taua lea e sosoo ai le itu I saute male itu saute sisifo o Savaii. O lenei ala tele e taua tele I felauaiga e le gata I tagata ae o oloa ma mea totino a tagata. Ole mafuaaga foi lea e faataua ai le tausia lelei o lenei alatele ma alasima I luga o vaitafe mo le puipuiga ma le saolegemu o tagata ma latou meatotino.

E 7 isi auala oloo faaaogaina I totonu ole Itumalo ma ua faata uma nei auala sei vagana ai le auala oloo fesootai ai Gautavai ma Sili ma le auala oloo fesootai ai Puleia ma Sili e le o faataina. E le o lelei le ala sima oloo kolosi ai taavale ile va o Sili ma Gautavai ma e tatau ona faaleleia ile lumanai aua le saogalemu o tagata feoai aemaise pe a louloua le tau.

AOGA
E 3 Aoga Amata a le Itumalo (Gataivai Metotisi, Gautavai EFKS and Sili Metotisi) ae 4 Aoga Tulagalua (Gataivai Primary School, Gautavai Primary School, Papa & Puleia Primary School, Sili Primary School). O le Kolisi i Palauli, le Itumalo ma Satupaitea, le Kolisi o Ueseliana e tele ina fa’aauau ai aoaoga a alo ma fanau a le Itumalo.