3.3 Atina’e Gafataulimaina: 3.3.1 Fa’ateleina Fua o Fa’atoaga

3.3.1 Fa’ateleina Fua o Fa’atoaga

O lenei Polokalame sa faia mo le au faifa’atoaga, tina fai laufala, laupaono ma toga u’a ina ia fa’atumauina le ola galulue ina ia lava meaai aua le fofoga taumafa a le itumalo, aemaise ia lava laufala mo galuega fa’atino a tina mo latou mea lalaga. Sa fa’agasolo muamua le resitalaina o faifa’atoaga i lalo o nu’u ta’itasi ma e 511 le uluai lesitala. Sa fa’apea ona faasoa atu lea iai o tiapula e fua i le manaoga ua faailoa mai. E 49,377 tiapula na fa’atau mai faifa’atoaga a le Itumalo mo fa’asoaina atu e fa’atino ai le Polokalame. E $25,000 sa fuafua mo lea tulaga ae e $24,688.50 na fa’aaoga.

Sa fa’apea ona fa’asolo lava asiasiga fa’a-le-masina ina ia mata’itu ai le fa’atinoga o atina’e o sui ta’itasi. Ma o aso sa fa’atino ai nei asiasiga e aofia ai 7/12/2022; 08/12/2022; 09/12/2022; 12/12/2022; 13/12/2022; 14/12/2022; 15/12/2022. Sa tu’uina atu pepa talaoloa (voucher) sa fa’a meaalofa mo sui lesitala uma sa mafai ona fa’aatinoina asiasiga. Sa tu’u sa’oloto pea i le au faifa’atoaga po o a ana mea faigaluega e fa’atau ai i le pepa talaoloa ae le mafai ona fa’aliutupe. I le mae’a ai o asiasiga, e 352 le aofaiga o faifaatoaga ma tina fai togalaufala etc sa fa’apea ona fa’amanuiaina i nei pepa talaoloa. E $115,000 na fuafua mo lenei vaega ae $148,300 na fa’aaluina mo pepa tala oloa ona ua to’atele latou na auai ma sa matauina foi le si’itia o tau o oloa. E $6,380 le vaega tupe na fa’aalu i le fa’atinoga o asiasiga a le soakomiti e totogi ai ta’avale sa fa’aogaina fa’apea alauni o le soakomiti.