3.2 Lotoifale ma le Si’osi’omaga

3.2.1 Puipuiga o le Lotoifale
Fa’atauina o Uaea Pa Pua’a
Na pasia e le Fono Fa’avae le fesoasoani atu i afioaga ta’itasi i taumafaiga ina ia malu puipuia meaituaolo mai le fa’aleagaina o aai. O le manulauti o lenei fesoasoani ina ia maua e afioaga ta’itasi ni si’osi’omaga mama, matagofie ma maloloina. E 800 uaea pa puaa sa fa’asoa atu i afioaga ta’itasi aua le fa’atinoga o pa mo le malu puipuia o meaituaolo. Sa fa’asoa tutusa lava ma e ta’i 160 uaea a le nuu mo le tufaina i aiga ta’itasi, ma sa tu’uina atu lava le fa’asoaina o uaea i le nu’u lava ia e faia le tufatufaga. E $129,200 le tau aofa’i na fa’asoaina mo nei uaea e 800.

E pei ona tu’uina atu i lalo, e 326 aiga o le itumalo na fa’asoa iai taaiga uaea e 739. E 52 taaiga uaea na fa’aaoga e Puleia mo le pa a le nu’u ae 6 taaiga uaea na lipotia e Sili ua leiloloa.

O le aotelega lava ia o le polokalame, o lo’o fa’aaoga tatau lava e le tele o aiga ma nisi o afioga o le itumalo pa uaea e faia ai pa puaa fa’apea foi le toe fa’alelei o saoauli o lo’o i tua maota ma tua laoa. O nisi foi o aiga, ua fa’aoga uaea e fa’apa ai toga laau aiga ina ia malu puipuia mai le fa’aleagaina e meaituaolo. Ae ua maitau foi e le Fono Fa’avae e auala i asiasiga sa fa’atinoina e le Ofisa, o lo’o iai foi aiga sa le fa’aaogaina tatau uaea ma o le ala lea ua taofi ai lenei polokalame sei toe va’avaai iai i le lumana’i mo se faiga talafeagai.