4 Valaaulia Fa’apitoa mo le Fa’ailogaina o le Tuto’atasi

O le valaaulia mai le Malo o se fa’amanuiaga mo le Itumalo ona o lolo amanai’a mai e tauala tai i le Afioga i le Ta’ita’i Fono. O lea tapenaga e le itiiti lona fa’atupega ona o tapenaga fa’apea fo’i lona fa’atinoina. Sa masi’i e Itumalo ma sa molimauina le matagofie o le ausiva ma fa’afiafiaga sa tapenaina e nisi o Sui Talavou ma le ta’itaiga a le tofa ia Fiu Semaia i le a’oina ma le fa’atonutonuga o lea fa’amoemoe. E to’a 128 le ausiva ma le aumalaga na malaga mai i Upolu aua le fa’atinoina o lea fa’amoemoe ma o lo’o fa’apipi’i atu i tua o le Lipoti suafa uma o i latou ia.

O le taualuga o le fa’afiafiaga a le Itumalo sa sa’asa’a ai le alo tamaita’i ia Iliganoa Fotuitaua o le Afioga i le Minisita ia Leota Laki ma le faletua ia Galumalemana Margaret fa’apea sui ole Fono Fa’avae. Sa fa’apea foi ona sa’asa’a ai Le Afioga ia Fa’amausili Leinafo, le Masiofo a le tama a aiga ma le Afioga i le tamaita’i Palemia ia Fiame Naomi Faumuina Mataafa Mulinuu II. O le seleni na maua mai i le Malo mo lea fa’amoemoe na fa’amanuiaina ai le ausiva e taui ai lo latou tautiga.