3.1.4 Fa’aagava’aina o Tagata

Polokalame atina’e Tupulaga Talavou

O se tasi o vaega o lo’o ave iai le fa’amamafa a le Itumalo o le atina’eina lea o tupulaga talavou e ala i Polokalame e atia’e ai lo latou soifua fa’aletino aemaise le agaga. Talu ai ona o le tuai ona fa’amatu’u mai o vaega tupe mai le Malo, ua le mafai ai ona fa’atino le tele o galuega fuafuaina. E ui o lea, na mafai ona fa’ataunu’u se Polokalame mo le ta’amilosaga netipolo sa ma sa tapena mai aoga tulaga lua e 4 a le itumalo ma au ta’itasi mo le ta’amilosaga, ae ta’i 2 mai au a tupulaga talavou mai nu’u uma e 5 o le itumalo. E tasi le au a teine tupulaga talavou ma le au suifefiloi a tama ma teine. E fa’amauina foi le agaga o le fa’afetai i le kamupani a le BSL mo fa’ailoga na tu’uina mai mo le tauvaga. O le aofaiga o le seleni na fa’aaluina mai le pakeki o le Itumalo e $4,970.

E 5 vaiaso na fa’asolo ai lenei Polokalame sa fa’atautaia e le Asosi Netipolo a Samoa ma sa faia ai ni a’oaoga/koleniga a tupulaga talavou fa’apea faiaoga ma ta’ita’i o Tupulaga Talavou i le fa’atinoina o lenei ta’aloga. Pe a ma le 450 tupulaga talavou na auai i lenei Polokalame ma sa taualuga i se tauvaga i le aso 4 ma le aso 5 o Aokuso. O lea fa’amoemoe sa ta’imua iai sui o Tupulaga Talavou fa’atasi ai ma le lagolago o le Faletua ia Galumalemana Margaret. E fia fa’amauina le lagolago o Alii ma Faipule o Papa ma Puleia e auala mai i le fa’aogaina o le malae o le aoga tulaga lua e aunoa ma se totogi. E le gata i lea sa fa’apea foi ona iai le fa’amalumaluga a ali’i ma faipule o le itumalo mo le malu puipuia o lea ta’amilosaga.

Na maua foi le avanoa o ni sui Tupulaga Talavou e 6 e auai i le aoga faa’komepiuta sa fa’atautaia e le Fa’alapotopotoga Pisinisi o Tumaoti i Samoa mai le aso 11 – 14 o Iuni. E nei avanoa na maua fua e leai se totogi ae na maua ai tusi pasi o i latou sa auai i le a’oaoga ma ua si’itia foi lo latou silafia i nisi o vaega o le fa’aaogaina o nei masini.