E mulimulita’i le fa’atinoga o lenei fuafuaga autasi i le Anavatau a le tatou Malo, lea olo’o ave ai le fa’amuamua i le atina’ega o se si’osi’omaga saogalemu ma malupuipuia e u’una’ia ai le nofo fealofani o ona tagata. E lima Poutu o le a ta’iala ai faatinoga o lenei fuafuaga ma lima taitaia e Vaega Taua e 11 e fa’asinoala i galuega e ausia ai lenei fa’amoemoe. O Poutu nei e lima:

1. Fa’aleleia le Soifuaga Saogalemu
2. Ausia o se Tamaoaiga Gafataulimaina
3. Faamautu o Pulega Faatuatuaina
4. Ati’ae se Siosiomaga Malu Puipuia
5. Fa’aleleia Auaunaga Lautele

E ui e taumua tutusa uma le taua o nei Poutu e lima i le atina’ega o tatou tagata, ae o le a ave le fa’amuamua i le si’itia o le soifuaga saolegalemu mo i latou e utiuti le faasoa, lē tagolima, lē atoatoa le soifua maloloina ma le vaivai o le a’oaoga. E malosi le talitonuga a maua e tagata le agaga ola tauivi ma tagiilima ona ua atoatoa le aoaoga ma le soifua maloloina, o le a ausia la tatou anavatau fa’atasi ai ma le lagolago a le tatou Malo ma tatou pa’aga mai fafo. O le ave o le fa’amua i le atinaega o le soifuaga saogalemu ma agava’a o tagata o le a fesoasoani lea i le atinaega o le ola tutoatasi e feso’ota’i atu i le soifuaga gafataulimaina lelei o le tagata ma lona aiga. O le fa’amua foi lea a le tatou Malo i lana fuafuaga autasi.

E lima ta’itaia le fa’atinoga o nei galuega i aga tauoloa ma aga tausili ua fa’amautuina ma fa’amalosia mai e le tatou mautauave “fa’amaite e siitia le soifua manuia o tagata uma ’’e atagia mai ai le fa’atauaina o le fa’atino ma le mae’ae’a lelei o nei fuafuaga mo se manuia o tatou tagata.

O lenei tapenaga sa tofu sao iai le mamalu ole itumalo e tauala mai lea i o latou sui i totonu o le Fono Faavae. Ae le gata i lea sa āoāomanogi mai foi i finagalo o le saofaiga a tina ma tamaitai ma tupulaga talavou fa’apea le ma’ave eseese o le itumalo.

Matou te talitonu ua atoa le tapenaga o lenei ta’iala ona o le fa’asoa ma e lagolago a le tatou itumalo.
Ia fa’amanuia le Atua i lau tapuaiga.

Honorable Leota Laki Lamositele-Sio
Faipule, Itumalo Palauli le Falefa 2
Minisita, Matagaluega Tina, Tamaitai, Atinae o Nuu ma Agafesoota’i
Minisita, Fuainumera Faamauina o Samoa
Minisita Lagolago, Matagaluega o Tupe

Talaaga ole Itumalo

Fa’atomuaga

E muamua ona ou ta le tavai ma to’o ma sulua le to’o ma tula e pei o le tala i le seuga ifoifo nai le tuavao. Aua e faigata le paia maualuga o lau tapuaiga a le itumalo. Tulou Tulou lava !

O Palauli (2) o le itumalo fa’apalota sa igoa muamua i a Palauli le Falefa i le tele o tausaga ua mavae. O le suiga o le tulafono o faigapalota 2020 na vavae ese ai Tafua i le Fa’asaleleaga 1 ae totoe ai loa nu’u mavae e 5 lea e aofia ai Gataivai, Gautavai, Papa, Pule’ia ma Sili. O lenei itumalo e tolu iai itu o le itumalo fa’aleaganu’u o Palauli e aofia ai Palauli i Sisifo, Palauli le Falefa ma Palauli.

Fa’asinomaga

O le fa’alupega aotetele ole itumalo : ‘Afifio Tapaau e fa ma faleupolu e fa’. O nisi o tala logologoa e fa’asino tonu lava ia Palauli (2) Falefa e aofia ai; Funefeai ma lona tupuaga, Faugagana i Sili, Maota o Taufau i Papa, Igagato a Pule’ia, Vai gafa o le Tagaloa i Gautavai, Papa o le fa’atolotologatama ma le Ala o le Mativa i Gataivai ma le tele o isi tala ua le ta’ua ae olo’o i totonu o le itumalo. O usuga tau tupu ma talaga gafa a faleupolu ua ala ai nei ona nofo ma tupu mamalu le itumalo ma uluola.

Si’osi’omaga

E lanulauava ma lafulemu ona laufanua ona e aga ile itu ole savili mai saute e mafua ai ona malū le ‘ea e puaina mai e laau. O lo’o fa’amalumalu mai foi ile itu i matu ona atumauga olo’o tutasi ai ma le Mauga Silisili ma ole ala lena o le ola lau’usiusi o fa’atoaga aemaise o lafumanu ma mea fafaga. E le gata ina lelei le vao ma susu le ele’ele ae o le tele o punavai e fai ma to’omaga i aso mugala.

I le faitau aofa’i o fa’atoaga, lafumanu ma faigafaiva sa fa’ataunu’uina i le 2019, na fa’amauina ai le aofaiga o aiga olo’o galulue i fa’atoaga e 422. O le aofaiga o lona eleele ua mafai ona fa’ato’aina i fa’atoaga ma lafumanu pe tusa lea ma le 4,324.8eka. E tusa lea ma le 94.2% o eleele o le itumalo olo’o galulue i fa’atoaga ma lafumanu ma o se vaaiga e fa’ailoa ai e tua le itumalo i ona fanua mo lona tamaoaiga.

O lenei itumalo e fa’amanuiaina tele i le suavai ma o le ala lea o le fa’atino lava e latou o la latou polokalama suavai fa’atasi ai ma le fesoasoani a le Vaega o Vai Tumaoti (IWSA).

E tusa ai ma fa’amaumauga mai le Ofisa o Fuainumera Fa’amauina i lana tusigaigoa 2021, na fa’amauina ai le faitau aofa’i o lenei itumalo e 3059 i lona vaevaega e 1581 alii ma le 1478 tamaita’i ae 448 aiga i totonu o le itumalo atoa.

E tusa ma le 20% o le aofa’i o tagata ole itumalo o tamaiti i lalo ole 15 tausaga le matua. O le tasi lea vaega e ave iai le fa’amuamua e pei ona fa’ailoa i lana fuafuaga mo ana atina’e 2022 – 2026, ona o le lumana’i manuia o se itumalo e fa’alagolago lea i le tapu’e ma a’oaoina lelei o ona tupulaga. E pine lea mau i nisi tama fanau ua tele o latou sao i vaega o faifa’atoaga ma pisinisi tumaoti, umia tulaga pulega i auaunaga a le Malo ma Vaega Tumaoti e aofia ai ekalesia, ta’aloga, pisinisi, ma auaunaga lautele. Fono

Fa’avae a le Itumalo

O le filifiliina o sui auai o le Fono Fa’avae sa tu’uina atu i nu’u ta’itasi e fa’aaoga iai le tofa mamao ma le moe o’o i ali’i ma faipule o afioaga. Sa malilie uma nu’u i o latou sui e to’alua na filifili mai ma ave iai lo latou lagolago. Ua fa’apena fo’i ona iai ma sui mo tupulaga talavou i totonu o le fono fa’avae. O se vaaiga matagofie ma ua lalago fa’atasi ma le anava tauave a le faigamalo ua iai nei e fa’ataua sao o tagata uma i le atina’ega o lona tamaoaiga.

O le Fono Fa’avae e sefululima ona sui auai ae olo’o auai ma galulue so’oso’o tau’au foi ma Sui o Nu’u ma Sui Tamaita’i o Nu’u uma o le itumalo ma ua fa’aopopo mai ai leisi malosi o le Fono Fa’avae a Palauli (2) Falefa.

O sui la nei o le Fono Fa’avae a Palauli (2) Falefa :

1. Ta’ita’ifono : Hon. Leota Laki Lamositele-Sio
2. Sui Taitaifono : Laulu Tiatia Mapesone Mapuilesua
3. Failautusi : Fa’aolatane Fiu Tuala Iona Pa’o
4. Sui o Gataivai : Lina Langford
5. Sui o Gataivai : Leuila Nuu
6. Sui o Gautavai : Asotasi Samu
7. Sui o Gautavai : Leota Fiapule
8. Sui o Puleia : Nita Viliamu
9. Sui o Puleia : Maumalii Aleki
10. Sui o Papa : Tamara Maui
11. Sui o Papa : Faumuina Tuipala
12. Sui o Sili : Kalava Siata
13. Sui o Sili : Tooala Samuelu
14. Peleiupu Evile : Sui Tupulaga Talavou.
15. Kalolo : Sui o Tupulaga Talavou

O sui nei o Nu’u ma Sui Tama’ita’i o Nu’u olo’o galulue so’oso’otauau ma le Fono Fa’avae i ana galuega fa’atino mo le soifua manuia o tagata o le Itumalo.

1. Sui Tamaita’i, Gataivai : Fiu Puaina Nanai
2. Sui o le Nu’u, Gataivai : Leuluaiali’i Mau
3. Sui Tamaita’i, Gautavai : Tuafale Momoe
4. Sui o le Nu’u, Gautavai : Fiu Tavita
5. Sui Tamaita’i, Puleia Limalau Tea
6. Sui o le Nu’u, Puleia Fepuleai Kamu
7. Sui Tamaita’i, Papa : Fa’atoese Lomitusi
8. Sui o le Nu’u, Papa : Taematua Tunuufi
9. Sui o le Nu’u, Sili : Fiu Siolo :
10. Sui Tamaita’i, Sili : Venise Fiu Tavita

E fa’ataua ma fa’amuamua e le itumalo o Palauli (2) Falefa. pulega lelei ma le manino ma ua feso’ota’i lelei ma se tasi o vaega taua olo’o ave iai lana fa’amamafa i ana polokalama atina’e. E malu mea uma i le pule mamalu a ali’i ma faipule ae lautua i le fa’aKerisiano olo’o galulue iai le Aiga SaLevi.

O le ala lea o le manatu o le Fono Fa’avae e fa’ataua vaega nei ona e afua matagi i le soifuaga manuia aemaise o se itumalo e sa’oloto mai sauaga ma fa’alavefau o le olaga.

O le Puleaina o meatotino a le Itumalo o Palauli (2) Falefa.

O le Pule e mai tagata uma o le itumalo e ala i pulega mamalu a ali’i ma faipule o nu’u uma ole itumalo.

O meatotino uma e i lalo o le vaaiga a le Fono Fa’avae o mea totino a tagata o le itumalo, ma e ao ona fa’asoa mo le manuia lautele ma fa’aaloalogia tagata uma o le itumalo, o ō latou talitonuga fa’a-Kerisiano ma o latou fa’asinomaga fa’aleaganu’u.

3. Puipuia tagatanu’u ma o latou aia tatau,
E ao ona puipuia tagata uma o le itumalo ma a latou aia tatau i lalo o le Fa’avae o le Malo Tuto’atasi o Samoa.

4. Fa’amanino tiute fai o tagatanu’u uma o le itumalo.
O vaega uma o le itumalo e ao ona galulue ma malamalama lelei e tatau ona fa’amanino i ō latou tiute fai i tagata o le itumalo.

AUILIILIGA OLE TA’IALA
MAUTAUAVE
Faamaite e siitia le soifua manuia o tagata uma

ANAVATAU
“Ia fa’amautu se si’osi’omaga e sa’oloto, saogalemu, ma soifua manuia ai tagata uma o le itumalo”

MANULAUTI
Ia ta’imua tu ma aganu’u ma le fa’akerisiano e tapu’e ai le atina’ega o tagata ta’ito’atasi ma aiga ole Itumalo. Ia fa’amautuina le galulue punoua’i ma ola tuto’atasi i le fa’aaogaina ma le tatau o alaga‘oa e tua iai mo se tamaoaiga e gafatia taulima.

FA’ATINOGA
O le a fa’atulaga e le Fono Faavae ni ta’iala autu mo ana galuega e ausia ai lana Anavatau ina ia maua ai e tagata taito’atasi, ma ‘aiga o le itumalo le fiafiaga ole nofo i se si’osi’omaga saogalemu

FUAFUAGA E AUSIA AI POUTU E LIMA

1. FA’ALELEIA O LE SOIFUAGA SAOGALEMU

1.1 Ta’iala o le Poutu
Ia maoti ma lelei auaunaga e maua ai e tagata ma aiga uma se soifuaga manuia.

O le a fa’aleleia atilli o auaunaga mo le soifua manuia ona olo’o maitauina pea le fa’atupulaia o i latou e utiuti le fa’asoa ma lē tagolima, lē lelei le soifua maloloina ma le tulaga o a’oaoga.

1.2 E fa’apefea ona Ausia?
E fa (4) vaega taua o le a fa’atino ai galuega mo lenei fa’amoemoe:

1) Soifua Manuia – Ia maua e tagata uma se soifuaga to’afilemu ma fa’amalieina;
2) Soifua Maloloina – Ia maua e tagata uma auaunaga e puipuia ai le malosi ole tino ma le tausiga lelei o gasegase;
3) Soifua A’oa’oina – Ia maua e tagata uma avanoa mo a’oaoga ma tomai talafeagai;

Soifua Agava’a – Ia fa’aagava’aina tagata uma ile fa’atinoga o a latou matafaioi ma taleni.

2. TAMAOAIGA E GAFATAULIMAINA

2.1 Ta’iala o le Poutu

Ia lava avanoa ua saunia lelei mo tagata uma e galueina ai atinaé e tausi ai o latou aiga.

E lē o tulaga lelei le atina’e ma le tamaoaiga o le itumalo pe a fua i le lava o fua o faatoaga taumafa ma le aofa’i o tagata e leai ni galuega. O tupe ma fa’amomoli mai aiga i fafo olo’o lagolago tele ile tausiga o aiga.

2.2 E fa’apefea ona ausia?

E fa (4) vaega taua ole a fa’atino ai galuega mo lenei fa’amoemoe:

1) Atinaega o Fa’atoaga ma Faiga Faiva – ia lava mea taumafa e lagolago ai le tamaoaiga o tagata ma aiga;

2) Fa’atupulaia o Pisinisi – ia tauluola pisinisi a tagata o le itumalo aemaise pisinisi laiti, ma pisinisi gaosi oloa;

3) Fa’aleleia o atinaé Turisi – ia avea pea pisinisi Turisi ma ala manuia o tagata o le itumalo;

4) Atinaega o Itumalo – ia fa’aleleia atili le tamaoaiga o nu’u ole itumalo e fa’asafua ai fa’amanuiaga i tagata lautele.

3. FA’ATUATUAINA PULEGA LELEI

3.1 Ta’iala o le Poutu

Ia malu puipuia le sa’olotoga o faiga filifiliga a tagata i tulafono ma aiaiga ua fa’ataatitia e o gatasi ma le Fa’avae ole Malo Samoa. Ia toe faia se iloiloga o nisi o tulafono a nuu oloo feteenau ma tulafono a le Malo faapea le Fa’avae ole Malo o Samoa.

3.2 E fa’apefea ona ausia?

E fa (4) vaega taua ole a fa’atino ai galuega mo lenei fa’amoemoe:

1) Fa’atulagaga o Tulafono – Ia manino ma malamalama lelei tagata ile agaga o tulafono uma olo’o fa’atonutonu ai le fa’atinoga o galuega i totonu o le itumalo;

2) Fa’amaninoga o Galuega – Ia manino ma malamalama lelei tagata i taunuuga o galuega oloo fa’atino e vaega uma ole Itumalo;

3) Aufaigaluega Agava’a – Ia mafai ona fa’atino auaunaga atoatoa ona lelei mo tagata uma;

4) So’otaga – Ia malu puiapuia le sa’olotoga o tagata o le itumalo o totonu o Samoa ma fafo ma ia maua fa’amanuiaga talafeagai e fesoasoani ile tausiga o aiga.

4. SI’OSI’OMAGA PUIPUIA

4.1 Ta’iala o le Poutu

Ia malu puipuia ma saogalemu le si’osi’omaga ole itumalo ma fa’aaogaina ala oa fa’anatura e lagolago ai le tausiga o aiga.

E fa’ataua le puipuia o le Si’osi’omaga e aofia ai eleele ma ala’oa ona o le matuia o a’afiaga pe a lē mautu tapenaga aemaise o suiga ole tau ua fa’ateteleina ai matagi malolosi ma lologa.

4.2 E fa’apefea ona ausia?

E fa (4) vaega taua o le a fa’atino ai galuega mo lenei fa’amoemoe:

1) Fa’amautuina o Taiala – Ia limataitaina le fa’atinoga o galuega i tulafono ma aiaiga e puipuia ai le si’osi’omaga;

2) Fa’asaoina o alaga’oa Fa’alenatura Aemaise Vaomatua – Ia tumau pea le lanulauava ma le malupuipui o le si’osi’omaga o le Itumalo;

3) Fa’aaogaina o alagaoa fa’alenatura mo malosiaga fa’afouina – Ia puipuia le fa’aleagaina ole si’osi’omaga mai kasa o’ona;

4) Fa’ama’iteina o auala fa’apisinisi mai alagaoa e puipuia ai le si’osi’omaga – E maua ai galuega ma fa’amanuiaga e tausi ai aiga ma nu’u;

5. FAALELEIA O AUAUNAGA LAUTELE

5.1 Ta’iala o le Poutu

Ia fuafua ma fa’atulaga lelei le fa’atinoga o galuega ma atina’e e lagolago ai le tamaoaiga mo le soifua manuia o tagata ole itumalo.

Ia faia le iloiloga o le fa’atulagaga o galuega ma atina’e ina ia o gatasi ma fuafuaga mamao o le atinaega o le Itumalo. E ave le fa’amuamua i le atinaega o nu’u ina ia lagolago polokalame mo le atinaega o le soifua manuia ma le tamaoaiga.

5.2 E fa’apefea ona ausia?

E fa (4) vaega taua ole a fa’atino ai galuega mo lenei fa’amoemoe:

1) Fa’atulagaga o Taiala – Ia manino vaega ma ona agava’a fa’apitoa e gafa ma galuega ua fa’atulagaina;

2) Fa’aleleia o Auaunaga Lautele – Ia gafatia le tau ma lelei le fa’atinoga o auaunaga lautele i tagata ma aiga ole itumalo.

3) Fa’aaogaina o le Tekonolosi – Ia fa’aaoga tatau tekonolosi e lagolago ai le fa’atinoga o galuega a vaega eseese ole itumalo;

4) Fa’aleleia o Auaunaga ma le vaaia lelei o Meatotino – Ia maoti le vaaiga ma le fa’aaogaina o meatotino a le itumalo i auaunaga mo galuega ma ‘atina’e

FUAFUAGA OLE FA’ATINOGA O VAEGA TAUA (VT) MO PALAULI (2) FALEFA

VT 1 – FA’ALELEIA OLE SOIFUA MANUIA

Nu.	Galuega Fuafuaina	Faapefea ona fa’atino	Taunuuga o fa’atinoga
1.1	Fa’atulaga Taiala o Polokalame e ausia ai Soifua Manuia	Fai paaga ma fa’alapotopotoga tumaoti i polokalame talafeagai e fa’amautu ai le soifua manuia.	Ia o’o atu i le 2026 ua tu’uitiitia fa’asolo atu ina leai se utiuti o le fa’asoa ma le lē tagolima.
1.2	Fa’atulaga polokalame mo faleapitaga mautu mo aiga oloo manaomia	Feso’ota’i ma le polokalame o fale apitaga mo i latou olo’o a’afia Fa’atulaga isi fesoasoani e lagolago ai aiga lima vaivai	Ia o’o atu i le 2026 ua fa’asopolia aiga uma olo’o manaomia le fesoasoani i fale apitaga mautu.
1.3	Fesoasoani mo Tagata Matutua ma Aafiga Tumau	Feso’otai ma auaunaga olo’o fa’atino ai fesoasoani eseese mo i latou e iai fa’afiatauli tuga. Iloilo le faia ose nofoaga mo i latou e tuga o latou manaoga faapitoa	Ia fa’amalieina le au matutua ma i latou olo’o tausia i fale tausi matua ma ‘aafiaga tumau.
1.4	Faamalosia Auala mo le Taofia o Sauaga i totonu o Aiga ma Nuu	Ia fa’atotoga lelei ma ‘atoatoa le agava’a o i latou e faia le auaunaga Ia lava tapena mea faigaluega ma fesootaiga e lagolago ai vaega faapitoa	Ia taofia fa’afiatauli o lo’o lepetia ai le filemu ma le nofo fealofani o tagata, aiga ma nu’u.
1.5	Faaleleia auaunaga ole Suavai	Ia filifilia i latou e talafeagai agava’a ma le silafia e auai i polokalame Ia feso’otai ma polokalame olo’o fa’atino e le Malo ma ana pa’aga	Ia taumua tutusa avanoa mo tagata uma i le ausia ole soifua manuia.

VT 2 – TAUSIGA OLE SOIFUA MALOLOINA

Nu.	Galuega Fuafuaina	Faapefea ona fa’atino	Taunuuga o fa’atinoga
2.1	Ia fa’amalosia faiga pa’aga ma le Malo ma Fa’alapotopotoga Tumaoti ile fa’atinoga o polokalame mo le soifua maloloina	Soalaupule mo fa’atinoga o polokalame i totonu ole itumalo	Fa’aitiitia le fa’atamala i le tausiga o gasegase
2.2	Fa’amalosia polokalame e fa’ataua ai le tausiga ole soifua maloloina o tagata ma aiga.	Fa’atulaga polokalame mo le fa’aleleia atili o auaunaga i totonu o nu’u	Fa’aitiitia gasegase ma ia maua le soifua tulu’i e ausia le 75 tausaga.
2.3	Ia fa’aleleia fale komiti e fa’amautu ai le faatinoga o latou auaunaga	Fa’atotoga fale komiti ma fai pa’aga ma auaunaga tumaoti i le fa’atinoga o galuega. Fa’atulaga polokalame mo soifua manuia i le tausaga.	Ia maua uma auaunaga mana’omia i Falema’i ma ia gafatia le tau o togafitiga ma talavai mo gasegase uma.
2.4	Ia fa’amautu polokalame mo le faaleleia o agavaa o tagata i le tausiga o le soifua maloloina	Fa’atino aoaoga mo le au tausi matua Mataitu isi polokalame e aoga mo le tausiga o tagata matutua	Si’itia le tomai o le aufaigaluega i ona vaega uma
2.5	Fa’atulaga polokalame e puipuia ai tagata ma aiga mai suiga fa’afuaseía	Faipa’aga ma Fono Fa’avae a isi itumalo mo le fuafuaina & fa’atinoga o Polokalame.	Ia lava tapena ma saunia tagata i auala e puipuia ai aiga ma nu’u.

VT 3 – FA’ALELEIA O AUAUNAGA O AOGA

Nu.	Galuega Fuafuaina	Faapefea ona fa’atino	Taunuuga o fa’atinoga
3.1	Fa’amalosia tulafono ma taiala I nuu e lagolago ai tulafono mo aoaoga	Ia mata’itu e pulega a nu’u ma saofaiga a tamaitai tulafono ma aiaiga mo aoga i totonu o nu’u ole itumalo	Ia ausia se tulaga maualuga ile fa’aiuga o polokalame o aoga
3.2	Ia fa’atulaga auala e fesoasoani ai ile fa’ataua o le gagaana, aganu’u, tala fa’asolopito ma talatuu a Samoa i ta’iala o a’oaoga.	Ia iai polokalame fa’aleaganu’u mai aoga amata e o’o i aoga maualuga	Ia ‘ao’aoina ma malamlama lelei tagata uma o le itumalo
3.3	Ia fa’amalosia pulega lelei i totonu o komiti o aoga i nu’u taitasi o le itumalo	Ia fa’atulaga lelei taiala e fa’atino ai galuega a le Komiti Faia se maliega aloaia ma le Malo ile fa’atinoga o auaunaga	Ia faigofie ona maua e tagata uma le avanoa e ‘ao’oga ai.
3.4	Ia tu’uitiita tau ma isi manaoga fa’aopoopo ua taotaomia ai le auai o tamati ile aoga	Ave’esea uma aiaiga le talafeagai olo’o taofia ai tamaiti mai le o i le aoga	Ia mafai ona auai tamaiti i le aoga i le taimi atoa ua fa’atulagaina
3.5	Ia fesoasoani e fa’ataua polokalame mo tupulaga talavou e aofia ai vaega e mana’omia aoga fa’apitoa aemaise agavaa mo galuega i fafo.	Fa’atulaga polokalame mo tomai ma matata ese’ese fa’apea taleni fa’apitoa – tusi ata, pese, musika, siva, I.T etc	Ia si’itia avanoa e tapu’e ai taleni ma maua ai galuega mo tupulaga talavou.
3.6	Ia mautu anofale o faleaoga uma i le itumalo e aofia ai le fa’aaogaina ole tekonolosi.	Ia fa’amautu so’otaga a le malo ma le Fono Fa’avae i le fa’atinoga o auaunaga i aoga. Ia fa’amaite le faia o fale fai meaaoga i nu’u ma ia atoatoa lona fa’atotogaina.	Ia lava le fa’asoa o alagaoa a aoga e ausia ai manaoga o tamaiti aoga. Ia lava le lagolago i tapenaga a tamaiti aoga.

VT 4 – FA’ALAUTELEGA O AGAVA’A

Nu.	Galuega Fuafuaina	Faapefea ona fa’atino	Taunuuga o fa’atinoga
4.1	Fa’atulaga ta;iala e aloaia ai feagaiga ma fa’alapotopotoga i totonu o le itumalo e lagolagoina galuega mo tina ma tamaita’i, tamaiti, ma le tupulaga talavou.	Ia mata’itu e pulega a nu’u ma saofaiga a tamaitai tulafono ma aiaiga mo aoga i totonu o nu’u ole itumalo	Ia ausia se tulaga maualuga ile fa’aiuga o polokalame o aoga
4.2	Fa’amautu polokalame mo atina’e ma ‘aoaoga mo agava’a eseese mo tina ma tamaita’i	Ia fa’atulaga manino le fa’atinoga o polokalame o galuega i le tausaga mo vaega o le a a’afia.	Ia fa’asafua tutusa fa’amanuiaga mo tamaita’i uma o le itumalo.
4.3	Fa’amautu ta’iala mo polokalame mo atina’e ma ‘aoaoga mo tupulaga talavou	Ia fa’avaeina polokalame mo le fa’alauteleina o agava’a ma taleni	Ia fa’aleleia ai olaga taumafai o tupulaga ma fa’aitiitia ai fa’afitauli tutupu ma aafia ai.
4.4	Fa’amautu tapenaga mo le fa’atuina o asosi o taaloga i le itumalo	Ia fa’atulaga polokalame fa’alauiloa e fesoasoani e siitia agavaa i pulega lelei	Ia avea ta’aloga o se ala manuia mo tupulaga ma aiga.
4.5	Fa’amautu se fale e fa’atino ai polokalame tau a’oaoga mo vaega fa’apitoa ia i le itumalo.	Ia fa’atulaga fuafuaga mo se fale ma lona fa’atupeina mo le fa’amoemoe	Ia mautu ma saogalemu fale e fa’atino ai polokalame ua fuafuaina

VT 5 – ATINAEGA O FA’ATOAGA , FAIGA FAIVA MA ATINA’E VAI

Nu.	Galuega Fuafuaina	Faapefea ona fa’atino	Taunuuga o fa’atinoga
5.1	Ia fa’amalosia auala e si’itia ai fua o fa’atoaga mo le taumafa ma fa’atauina I nu’u uma ole itumalo	Ia faia polokalame fa’atosina e fa’aosofia ai le fai fa’atoaga e maua ai faamanuiaga. Faipa’aga ma le MAF ma sosaiete tumaoti i le fa’atinoga o polokalame	Ia maua mea taumafa mo le aiga i taimi uma.
5.2	Ia fa’atulaga polokalame e lagolago ai le atina’ega o fa’atoaga i se tulaga e siitia ai le tamaoaiga o aiga ole itumalo	Ia saunia meafaigaluega mana’omia mo le fa’aaogaina e le faifaatoaga Ia fa’atu se fale fa’amiliga laau ile itumalo Faia polokalame fa’atosina e fa’aosofia ai le faia o fa’atoaga tetele pulea fa’apisinisi	Avea atina’e fa’atoaga ma alamanuia mo aiga uma ole itumalo
5.3	Ia fa’atulaga fuafuaga mole fa’aaogaina o ia ma figota mai le vai e si’itia ai le tamaoaiga	Ia faia se suesuega i ni auala e fa’aaoga ai figota ole vai mo meataumafa ma ala tupe maua.	Ia si’itia avanoa e fesoasoani ai e maua alamanuia mo aiga o le itumalo
5.4	Ia fa’atulaga auala e fesoasoani ai i le fa’atauina o fua o fa’atoaga.	Faia auaunaga faufautua mo le aufaifa’atoaga Fa’atu se nofoaga autu e fa’atau iai fua o fa’atoaga Ia fa’atulaga le vaitaimi e faia ai le fa’aliga o fua fa’atoaga mo le itumalo i tausaga uma	Ia fa’aitiitia le fa’aaogaina o meaai fa’atau mai fafo ae si’itia meaai mai fua o fa’atoaga
5.5	Ia si’itia fesoasoani i faiga faiva mo taumafa ma le tausiga o aiga	Ia si’itia fesoasoani i faiga faiva mo taumafa ma le tausiga o aiga	Ia si’itia le avea o figota ma i’a o le matai’ai ma ala manuia o aiga.

VT 6 – FA’ATUPULAIA O FA’AMANUIAGA MAI PISINISI

Nu.	Galuega Fuafuaina	Faapefea ona fa’atino	Taunuuga o fa’atinoga
6.1	Ia fa’atulaga fesoasoani e lagolago ai pisinisi ina ia tupu ma ola e si’itia ai le tamaoaiga o le itumalo	Ia faia polokalame ma ‘ao’aoga e fa’atosina ai tagata i le faia o pisinisi e lagolago ai tausiga o aiga.	Ia o’o atu i le 2026 ua o’o atu i le 40% le sao o pisinisi i le tamaoaiga o le itumalo.
6.2	Ia fa’aleleia auala e fa’atino ai pisinisi ina ia mafai ona fa’aauau i se taimi umi	Fa’amalosia suesuega e fa’amaite ai faiga fou e fa’aleleia ai pisinisi.	Ia o’o atu i le 2026 ua si’itia i le 50% tupe maua a pisinisi i le tausaga.
6.3	Ia fa’amautu sootaga ma ofisa ma fa’apotopotoga e maua mai ai fesoasoani mo pisinisi	Ia fa’atuina se sosaiete a le au fai pisinisi a le itumalo Ia mataitu polokalame e fesoasoani ai i le fa’aleleia atili o pisinisi	Ia o’o atu i le 2026 ua 20% le si’itia o pisinisi fou e fa’aopoopo mai totonu o le itumalo.
6.4	Ia faatulaga ni aiaiga ma taiala e puipuia ai pisinisi a tagata ole itumalo	Ia faia se resitala o pisinisi uma i totonu ole itumalo Ia mataitu le usitaia o aiaiga e pisinisi uma aemaise faatinoga o le auaunaga	Ia lē sili atu ma le 5 pisinisi e tapunia i totonu o le 4 tausaga mai 2022 i le 2026
6.5	Ia fa’atulaga se faiga e fa’atosina ai le fa’atuina o pisinisi e faipa’aga ai le nu’u / itumalo ma isi faipisinisi	Ia fa’atulaga ni faiga fa’apitoa e fa’atosina ai faigapa’aga i totonu ole itumalo	Ia o’o atu i le 2026 ua si’itia i le 50% avanoa faigaluega i pisinisi mo tagata o nu’u ma le itumalo.

VT 7 – FA’ALELEIA O ATINA’E TULISI

Nu.	Galuega Fuafuaina	Faapefea ona fa’atino	Taunuuga o fa’atinoga
7.1	Ia iai ni ta’iala manino mo le fa’atinoga o atinae turisi i totonu ole itumalo	Ia fa’atulaga lelei se faiga fa’avae e lima taitaina ai fuafuaga mo atina’e turisi i totonu o nu’u ma le itumalo e aofia ai le fa’aaogaina o ana alagaoa.	Ia o’o atu i le 2026 ua ausia le 30% ole sao o atinae turisi i le tau ole tamaoaiga a le itumalo.
7.2	Ia fa’amaite se siosiomaga mama o lotoifale o nu’u uma male itumalo	Fa’amalosia suesuega e fa’amaite ai avanoa e fa’aleleia ai pisinisi turisi.	Ia o’o atu i le 2026 ua 20% e si’itia ai tupe maua mai pisinisi turisi.
7.3	Ia fa’atulaga auala e lagolago ai atinae turisi e ausia ai se tulaga lelei ona fa’aauau pea.	Fa’aleleia mataaga fa’aleagauu, tala fa’asolopito ma talatu’u. Ia fa’aleleia fa’ailoilo, auala, fale apitaga, fale ui ma isi vaega uma e to’omaga iai malo asiasi.	Ia lē i lalo ifo o le 200 tagata faigaluega i pisinisi turisi I le 2026.
7.4	Ia fa’ataua le so’otaga o polokalame mo le puipuia ole si’osi’omaga ile atinaega o pisinisi tulisi.	Ia faia auala fa’atosina mo pisinisi turisi e faipa’aga ma polokalame o le siosiomaga. Faipa’aga ma auaunaga vaega tumaoti mo le fa’atinoga o polokalme fesoasoani i atina’e turisi.	Ia si’itia le numera o pisinisi turisi e fa’aaogaina alagoa mai si’osi’omaga.
7.5	Ia fa’atulaga le fa’alauiloaina o le itumalo o se mataaga tulaga ese mo tulisi.	Ia tapena se fuafuaga autu e faalaulioa ai nu’u ma le itumalo i tagata asiasi	Ia si’itia fa’amanuiaga mo atinae tulisi ina ia gafatia ona fa’aauau.

VT 8 – FA’ALELEIA O TAMAOAIGA O NU’U MA ITUMALO

Nu.	Galuega Fuafuaina	Faapefea ona fa’atino	Taunuuga o fa’atinoga
8.1	Ia fa’atulaga ta’iala e fa’amaoti ai le faiga pa’aga a le Malo ma pulega fa’a-itumalo.	Fa’atuina Fono Fa’avae a le Itumalo e pulea ma va’aia fa’atinoga o galuega	Ia si’itia avanoa mo galuega ma atina’e ma fa’aleleia agava’a i pulega o auaunaga lautele i totonu o nu’u ma le itumalo
8.2	Ia fa’atulaga fuafuaga mo le faatulagaga o atina’e i le itumalo e limata’itaia ai le fa’atinoga o galuega	Fa’atuina ofisa e lagolago i le fa’atinoga o galuega ma auaunaga a le itumalo. Fa’aagaga le 1 miliona tala mo le fa’atinoga o atinaé a le itumalo.	Ia maua uma auaunaga ma manaoga o tagata i totonu o le itumalo e fa’aitiitia ai feoaiaga aemaise taimi o fa’alavelaeve.
8.3	Ia fa’amalosia so’otaga a le itumalo ma fa’alapotopotoga ma pisinisi tumaoti i le fa’atinoga o atina’e ile itumalo	Ia maoti feagaiga ile fa’atinoga o galuega ma fa’amanuiaga ia ausia ai le taunuuga mo’omia.	Ia le lalo o le 50% si’itiaga o galuega fou i totonu o le itumalo i le 2026.
8.4	Ia fa’ataua le malamalama e fa’amautu ai puipuiga o alalafaga mai aafiaga ole suiga ole tau	Ia fa’atulaga polokalame mo a’oaoaga faalauiloa e fa’amautu ai le puipuia o alalafaga. Faipaaga ma Fa’apotopotoga Tumaoti i mataupu tau Siosiomaga	Ia lava tapena ma saunia lelei puipuiga talafeagai o alalafaga mo suiga faafuasei ma le le maalofia

VT 9 – FA’ALELEIA O TULAFONO, T A’IALA MA SO’OTAGA

Nu.	Galuega Fuafuaina	Faapefea ona fa’atino	Taunuuga o fa’atinoga
9.1	Ia toe soalaupule le itumalo ia fausia ni faiga fa’avae ma ta’iala e lanugatasia ai pulega a nu’u ma le itumalo	Ia tu’ufaatasia tulafono a nu’u ma soalaupule mo se iloiloga ia laugatasia ai faiga faavae a nu’u uma ole itumalo	Ia lanugatasia le faatinoga e pulega a nu’u o le itumalo o tulafono ua autasi iai
9.2	Ia fa’amalosia le mulimulita’i i tulafono ma ta’iala ua fa’atulaga mo le pulega o le Fono Faavae	Ia malamalama uma sui ole Fono Fa’avae i tulafono ma taiala mo le faatinoga o latou tiute	Ia mautu vaega uma o pulega lelei i taimi uma
9.3	Ia fa’atulaga polokalame e fa’aleleia ai agava’a o tagata faigaluega i totonu ole itumalo i ona vaega eseese	Ia fa’atulaga le faagasologa o polokalame ina ia sopolia uma vaega o pulega a nu’u ma le itumalo	Ia fai sao uma tagata o le itumalo i polokalame mo manuia lautele o tagata ma aiga ole itumalo
9.4	Soalaupule le itumalo i le faia o ni so’otaga ma nisi o itutino i totonu ma fafo atu o Samoa.	Ia fa’amaite le fa’atuina o mafutaga a tamafanau a le itumalo i Apia, NZ, Ausetalia ma Amerika Samoa ma Amerika e lagolagoina le Fono Fa’avae a le Itumalo	Ia fai sao tamafanau a le itumalo i faiga tonu ma faiga filifiliga i le atinaega ole soifua manuia o tagata ole itumalo

VT 10 – PUIPUIGA OLE SI’OSI’OMAGA MA A’AFIAGA SUIGA OLE TAU

Nu.	Galuega Fuafuaina	Faapefea ona fa’atino	Taunuuga o fa’atinoga
10.1	Faamalosia le lagolago i tulafono e toe fa’amautu ai polokalame e puipuia malu ai le si’osi’omaga mai a’afiaga o suiga ole tau	Fa’atulaga fuafuaga e si’itia ai le silafia ma agava’a o tagata i le puipuia malu o meatotino ma le siosiomaga Ia mamafa fa’asalaga o solitulafono pe a le usitai’a tulafono ma ta’iala. Fa’atulaga polokalame mo le puipuiga ole gataifale aemaise taligalu ma auala al	Ia o’o atu i le 2026 ua fa’amaonia le mautu o puipuiga o le si’osi’omaga mai a’afiaga o suiga ole tau
10.2	Fa’atulaga ni ta’iala e fa’atonutonu ai le usitaia o tulafono e nuu o le itumalo	Ia fa’atulaga polokaame fa’asao ma le totoina o laau i nu’u ma itumalo ia ausia le 1000 eka	Ia o’o atu ile 2031 ua sili atu ile 200 miliona tala ile tausaga le tupe maua mai le ea fa’asao ona o toga vao.
10.3	Ia fa’atulaga faiga e fa’aosofia ai le fa’aaogaina o auala fa’anatura ile galueina o atina’e	Ia fa’atulaga ni polokalame fesoasoani mo atina’e e fa’aaoga ai ala oa fa’anatura i atina’e pisinisi	Ia si’itia ile 20% pisinisi atina’e e fa’atauaina le fa’asaoina o le si’osi’omaga ile 2026
10.4	Ia fa’atulaga ni ta’iala e lagolago ai aiaiaga olo’o ao ma ta’alao ai le lapisi	Ia fa’’amalosia taumafaiga e puipuia ai le siosiomaga mai lapisi ma fa’aitiitia le fa’aotaota i nofoaga faitele	Ia fa’atumau le mamā ma le lanulauava o le si’osi’omaga o Palauli le Falefa

VT 11 – FAALELEIA O AUAUNAGA LAUTELE

Nu.	Galuega Fuafuaina	Faapefea ona fa’atino	Taunuuga o fa’atinoga
11.1	Fa’atulaga fuafuaga mo galuega ma atinaie i totonu o le itumalo	Ia fa’atulaga le faiatinoga o galuega e fua i manaoga taua o atina’e ua fuafuaina	Ia maualuga le tulaga o le auaunaga e ausia mo meatotino e umi ona fa’aaoga.
11.2	Ia fa’amautu taiala e faatino ai auaunaga lautele I totonu ole itumalo	Ia fa’ataatia polokalame ma galuega faatino o vaega o atinae tetele i le itumalo	Ia aua ne’i motusia ma ia gafatia le tau o auaunaga lautele i totonu ole itumalo
11.3	Ia faiatulaga aiaiga e mataiitu ai le fa’aaogaina o ole tekenolosi i ata ma fa’amatalaga le talafeagai ma le tulafono.	Ia faiatulaga faiasalaga ole le tausisia o aiaiga ma tulafono. Ia le totogia le faiaaogaina ole tekanolosi mo aoga, fale faimea’aoga, ma fale komiti.	Ia aoga le tekonolosi e lagolago ai le faiatinoga o atina’e mo le manuia lautele o tagata
11.4	Ia soalaupule ma fa’atalanoa avanoa o le lisiina o fanua faialeaganu’u mo galuega tau atina’e	Ia fa’atulaga polokalame fa’alauiloa ia manino ai a’afiaga ma fa’amanuiaga o aiga mai le lisi o fanua faialeaganu’u	Ia fa’aaoga fanua fa’aleaganu’u e fesoasoani i le atinaega ole tamaoaiga o nu’u male itumalo

O SIATA MO LE MATAUINA OLE FAATINOGA O GALUEGA ( FAATA’ITA’IGA)

FA’ATUMAUINA LE SOIFUA MANUIA O TAGATA UMA OLE ITUMALO

AOTELEGA O GALUEGA UA MAEA FAATINO

O le aotelega lenei o galuega ua maea on fa’atino talu ona fa’avae le Fono Fa’avae a le itumalo.

Taimi	Galuega Fa’atino
Iulai – Aukuso 2021	Amata fa’atalatalanoaga mo le fa’atuina ole Fono Fa’avae ma filifili ai se Komiti Le Tumau
Setema 2021	Filifilia le Komiti a le Fono Fa’avae ma lesitala o se Sosaiete Lesitalaina ile Matagaluega o Pisinisi ma Alamanuia
Novema 2021	Amata tapenaga mo le fa’atuina ole ofisa ole Fono Fa’avae
Ianuari 2022	Amata galuega ole ofisa ina ua faia se maliega ile va ole Fono Faavae ma Alii ma Faipule ile faaaogaina o se vaega ole faleaoga mo le ofisa
Mati 2022	Amata fa’atalatalanoaga mo Fuafuaga ole Atinaega ole Itumalo
Me 2022	Tofia ai le aufaigaluega tumau a le Fono Fa’avae e toatolu, ole Taitai Ofisa, Ofisa mo Polokalame, ma le Ofisa Fesoasoani.
Iuni 2022	Tatala aloaia le ofisa ole itumalo, faailogaina ole 60 tausaga ole tutoatasi ole Malo o Samoa, ma le tatalaina ole amataga ole polokalame e tausia ai le soifua maloloina.
Iuni 2022	Sainia le Maliega ma le Malo e auai ile Polokalame mo le Atinaega o Itumalo ma agavaa ai loa ile $200,000 e fa’atulaga ma tapena ai le ofisa tutotonu ole Fono Fa’avae.
Setema 2022	Folasia le Fuafuaga o le Atinaega o le Itumalo i luma o le Itumalo mo le taimi mulimuli.